- అమెరికాలో భారతీయ టెక్కీల భవిష్యత్తుపై అనిశ్చితి
- స్వదేశంలో ఇళ్ల కొనుగోళ్లకు ఊతం లభించేనా?
అమెరికాలో గ్రీన్‌కార్డ్‌ పొందాలనుకుంటున్న భారతీయ ఐటీ నిపుణులకు ఎదురైన తాజా ఆంక్షలు ఇప్పుడు మరో కీలక ప్రశ్నను తెరపైకి తెచ్చాయి. అమెరికాలోనే స్థిరపడాలన్న లక్ష్యంతో పనిచేస్తున్న టెక్కీలు తమ ప్రణాళికలను మార్చుకుంటారా? కొందరు స్వదేశానికి తిరిగొచ్చి ఇళ్లు కొనుగోలు చేస్తారా? అమెరికాలో సంపాదించిన డాలర్లను భారత రియల్‌ ఎస్టేట్‌లో పెట్టుబడిగా పెడతారా? అనే చర్చ మొదలైంది. అయితే, ఆంక్షలు విధించినంత మాత్రాన భారతీయులంతా స్వదేశానికి తిరిగొస్తారని చెప్పలేమని రియల్‌ ఎస్టేట్‌ నిపుణులు అభిప్రాయపడుతున్నారు.
ప్రస్తుతానికి భారీ స్థాయిలో పెట్టుబడులు భారత్‌కు తరలివచ్చే అవకాశాలు పరిమితంగానే ఉన్నప్పటికీ, హైదరాబాద్‌ సహా ప్రధాన నగరాల్లో ప్రీమియం, లగ్జరీ గృహాలకు అదనపు డిమాండ్‌ ఏర్పడే అవకాశం ఉందని విశ్లేషిస్తున్నారు. అమెరికా అధ్యక్షుడు డొనాల్డ్‌ ట్రంప్‌ ప్రభుత్వం 2026 అక్టోబర్‌ 8న ఎనిమిది ప్రధాన టెక్నాలజీ, ఐటీ సేవల సంస్థలకు సంబంధించిన ఉద్యోగాధారిత శాశ్వత నివాస ప్రక్రియలో కీలకమైన పీఈఆర్ఎం (పర్మనెంట్‌ లేబర్‌ సర్టిఫికేషన్‌) కార్యక్రమాన్ని నిలిపివేసింది.
ప్రభావిత సంస్థల్లో టాటా కన్సల్టెన్సీ సర్వీసెస్‌ (టీసీఎస్‌), ఇన్ఫోసిస్‌, విప్రో, హెచ్‌సీఎల్‌ టెక్నాలజీస్‌తో పాటు మైక్రోసాఫ్ట్‌, అడోబ్‌, కాగ్నిజెంట్‌, క్యాప్‌జెమినీ ఉన్నాయి. అమెరికా కార్మికుల ఉద్యోగాలకు నష్టం కలిగించే విధంగా విదేశీ ఉద్యోగులను నియమించుకుంటున్నారన్న ఆరోపణల నేపథ్యంలో ఈ చర్య తీసుకున్నట్లు అక్కడి అధికారులు పేర్కొన్నారు. అయితే, ఆయా సంస్థలు ఈ కార్యక్రమాన్ని వినియోగించుకున్న తీరుపై వచ్చిన ఆరోపణలు, వాటి ప్రభావం వంటి అంశాలు ఇంకా పరిశీలనలో ఉన్నాయి.
పీఈఆర్ఎం అనేది అమెరికాలో ఉద్యోగం చేస్తున్న విదేశీ నిపుణులకు యజమాని సహకారంతో గ్రీన్‌కార్డ్‌ పొందే ప్రక్రియలో కీలకమైన దశ. సాధారణంగా ఉద్యోగానికి తగిన అర్హతలున్న అమెరికా కార్మికులు అందుబాటులో లేరని యజమాని నిరూపించాల్సి ఉంటుంది. ఈ ప్రక్రియ నిలిచిపోవడం వల్ల ప్రభావిత సంస్థల ద్వారా శాశ్వత నివాసం పొందాలనుకునే ఉద్యోగుల ప్రణాళికలకు ఆటంకం కలగవచ్చు.
స్వదేశానికి తిరిగొస్తారా? పెట్టుబడులు పెడతారా?
అమెరికాలో గ్రీన్‌కార్డ్‌ ప్రక్రియపై అనిశ్చితి నెలకొనడంతో అక్కడ పనిచేస్తున్న భారతీయ ఐటీ నిపుణులు తమ దీర్ఘకాలిక ప్రణాళికలను పునఃసమీక్షించే అవకాశం ఉందని నిపుణులు భావిస్తున్నారు. అయితే, ఉద్యోగాలు, ఆదాయం, కుటుంబ పరిస్థితులు, భవిష్యత్తులో అమెరికా వలస విధానాలు ఎలా మారతాయన్న అంశాల ఆధారంగానే వారు నిర్ణయాలు తీసుకుంటారు.
డాలర్లలో సంపాదిస్తున్నవారికి భారత్‌లో పెట్టుబడులు పెట్టడం ప్రతిసారీ ఆర్థికంగా లాభదాయకం కాకపోవచ్చు. రూపాయి, డాలర్‌ మారకపు విలువల్లో మార్పులు పెట్టుబడులపై వచ్చే రాబడిని ప్రభావితం చేయవచ్చు. అమెరికాలో ఉద్యోగ అవకాశాలు, శాశ్వత నివాస అనుమతుల విషయంలో అనిశ్చితి పెరిగినా, అక్కడ నివసిస్తున్న భారతీయుల్లో ఎంతమంది స్వదేశానికి తిరిగి రావాలనుకుంటారనేది ఇప్పుడే అంచనా వేయలేమని నిపుణులు చెబుతున్నారు.
తక్షణమే పెద్ద సంఖ్యలో భారతీయులు స్వదేశానికి తిరిగొస్తారని భావించడం సరికాదని అంటున్నారు. అమెరికాలో ప్రస్తుతం ఉన్న ఉద్యోగాలు, వీసాలపై ఈ నిర్ణయం ప్రత్యక్షంగా ప్రభావం చూపడం లేదని, ప్రధానంగా గ్రీన్‌కార్డ్‌ ప్రక్రియలో ఆటంకాలు ఏర్పడుతున్నాయని వివరించారు. తిరిగొచ్చే కొందరు ఇళ్లు కొనుగోలు చేసినా, భారీ స్థాయిలో డాలర్లను భారత్‌కు తరలించే పరిస్థితి ఉండకపోవచ్చని అంచనా వేస్తున్నారు.
హైదరాబాద్‌కు ఎంతవరకు ప్రయోజనం?
అమెరికాలో పనిచేస్తున్న భారతీయ టెక్కీలు స్వదేశానికి తిరిగొస్తే హైదరాబాద్‌, బెంగళూరు, పుణె, ముంబయి, ఢిల్లీ-ఎన్‌సీఆర్‌ వంటి నగరాల గృహ మార్కెట్లకు కొంత మేలు జరగవచ్చని నిపుణులు విశ్లేషిస్తున్నారు. వీటిలో హైదరాబాద్‌ ప్రత్యేకంగా నిలుస్తోంది. ఐటీ, ఫైనాన్షియల్‌ సర్వీసులు, గ్లోబల్‌ కేపబిలిటీ సెంటర్లు (జీసీసీలు) విస్తరించిన నేపథ్యంలో ఇక్కడ స్థిరపడాలనుకునే నిపుణులకు ఉద్యోగ అవకాశాలతో పాటు గృహ ఎంపికలూ అందుబాటులో ఉన్నాయి.
ముఖ్యంగా కోకాపేట, నానక్‌రామ్‌గూడ, గచ్చిబౌలి, ఫైనాన్షియల్‌ డిస్ట్రిక్ట్‌ వంటి ప్రాంతాల్లో ప్రీమియం, లగ్జరీ గృహాలపై ఆసక్తి పెరిగే అవకాశం ఉంది. అమెరికా విధానాలపై అనిశ్చితి కొనసాగితే, కొందరు నిపుణులు భారత్‌కు తిరిగిరావడం లేదా ఇక్కడి నివాస రియల్‌ ఎస్టేట్‌లో పెట్టుబడులు పెట్టడం గురించి ఆలోచించవచ్చు. దీనివల్ల హైదరాబాద్‌, బెంగళూరు, చెన్నై, కొచ్చి వంటి దక్షిణాది నగరాల్లో లగ్జరీ గృహాలపై విచారణలు, కొనుగోలు ఆసక్తి వచ్చే కొన్ని త్రైమాసికాల్లో పెరిగే అవకాశం ఉంది.
ప్రస్తుత పరిణామాలను పరిశీలిస్తే, అమెరికా గ్రీన్‌కార్డ్‌ ఆంక్షలు భారత రియల్‌ ఎస్టేట్‌కు తక్షణమే పెద్ద బూస్ట్‌ ఇస్తాయని చెప్పలేం. అదే సమయంలో, వలస విధానాలపై అనిశ్చితి కొందరు భారతీయ టెక్కీలను స్వదేశంలో స్థిరపడటం, ఇల్లు కొనుగోలు చేయడం, పెట్టుబడుల విభజన వంటి అంశాలపై ఆలోచించేలా చేయవచ్చు.