హైదరాబాద్ లో ఇళ్ల ధరలు తగ్గాయా..? పెరిగాయా..?

హైదరాబాద్ లో రియల్ ఎస్టేట్ మార్కెట్ ప్రస్తుతం నిలకడగా ఉంది. సుమారు రెండేళ్లుగా భాగ్యనగరంలో నిర్మాణ రంగం స్తబ్దుగా ఉందని పలు నివేదికలు చెబుతున్నాయి. గ్రేటర్ సిటీలో ఇళ్ల అమ్మకాలు ఒక్కసారిగా పడిపోకపోయినా గతంలోలా మాత్రం అమ్మకాల జోరు లేదని రియల్ రంగ మార్కెటింగ్ వర్గాలు అంటున్నాయి. అయితే ఇదే సమయంలో భూముల ధరలతో పాటు స్టీల్, సిమెంట్ తదితర నిర్మాణ సామగ్రి రేట్లు పెరుగుతుండటంతో రానున్న రోజుల్లో ఇళ్ల ధరలు పెరిగే ఛాన్స్ ఉందని రియల్ రంగ నిపుణులు అంచనా వేస్తున్నారు. ప్రస్తుతం ఇళ్ల ధరలు కాస్త నిలకడగా ఉన్నప్పటికీ ముందు ముందు పెరిగే అవకాశం లేకపోలేదని చెబుతున్నారు. హైదరాబాద్ లో ప్రాంతాన్ని, ప్రాజెక్టుని బట్టి ఇళ్ల ధరల్లో భారీ వ్యత్యాసం ఉంది. సెలబ్రిటీలు నివాసం ఉండే జూబ్లీహిల్స్, బంజారాహిల్స్ వంటి ఏరియాలతోపాటు రాజకీయ, వ్యాపార, ఉన్నత వర్గాలు ఉండే ప్రాంతాల్లో ఫ్లాట్ల ధరలు ఆకాశాన్నంటుతున్నాయి. ఆయా ప్రాంతాల్లో కొత్త ప్రాజెక్టులు, గృహాల సరఫరా తక్కువగా ఉంటుంది. కొండాపూర్, గచ్చిబౌలి, మియాపూర్, కోకాపేట, ఫైనాన్షియల్ డిస్ట్రిక్ట్ వంటి పశ్చిమ హైదరాబాద్ లో అంతర్జాతీయ మౌలిక వసతులు, హైరైజ్ ప్రాజెక్ట్ లతో ఫ్లాట్ల ధరలు ఎక్కువ పలుకుతున్నాయి. దీనికి అనుగునంగా మారుతున్న కాలం, పెరుగుతున్న అవసరాల మేరకు విశాలమైన అపార్ట్ మెంట్లు, హైరైజ్ ప్రాజెక్టులకు డిమాండ్ పెరిగింది. దీంతో బిల్డర్లు హైరైజ్ ప్రాజెక్ట్ లలో స్విమ్మింగ్ పూల్, జిమ్, వాకింగ్, జాగింగ్ ట్రాక్స్ వంటి ఆధునిక వసతులను కల్పిస్తున్నారు. ఇదే సమయంలో నగర శివారు ప్రాంతాలైన నాగోల్, పటాన్ చెరు, శామీర్ పేట, మేడ్చల్, హయత్ నగర్, బాచుపల్లి వంటి ప్రాంతాల్లో ప్రస్తుతం ఒక మోస్తారుగా ఇళ్ల ధరలున్నా.. క్రమంగా పెరుగుతున్నాయి. ఇక హైదరాబాద్ లో నివాస ఇళ్లకు భారీ డిమాండ్ ఉన్న కోకాపేట, నార్సింగి, పొప్పాలగూడ, నానక్ రాంగూడ, ఫైనాన్షియల్ డిస్ట్రిక్ట్ వంటి ప్రాంతాల్లో లగ్జరీ ప్రాజెక్టులు వస్తున్నాయి. వీటి పరిధిలో చదరపు అడుగుకు 8,500 రూపాయల నుంచి 18 వేలకు పైగానే ధరలు ఉంటున్నాయి. అదే శివారు ప్రాంతాల్లో ప్రాజెక్టును బట్టి చదరపు అడుగు 5.500 రూపాయల నుంచి 8 వేల రూపాయల మధ్య ధరలున్నాయి. హైదరాబాద్ లో ఏయే ప్రాంతాల్లో ఇళ్ల ధరలు ఎలా ఉన్నాయో తెలుసుకుందాం... నగరంలోని పలు ప్రాంతాల్లో అపార్టుమెంట్లలో ఫ్లాట్ల ధరలు నార్సింగి రూ. 8,500 నుంచి రూ.14,000 కొండాపూర్ రూ.7,200 నుంచి రూ.12,000 ఖాజాగూడ రూ.7,800 నుంచి రూ.13,000 మణికొండ రూ.8,500 నుంచి రూ.12,000 నానక్ రాంగూడ రూ.9,500 నుంచి రూ.16,000 మాదాపూర్ రూ.11,000 నుంచి రూ.15,000 కోకాపేట్ రూ.10,500 నుంచి రూ.15,000 జూబ్లీహిల్స్ రూ.12,000 నుంచి రూ.18,000 బంజారాహిల్స్ రూ.12,000 నుంచి రూ.18,000 హైటెక్ సిటీ రూ.12,000 నుంచి రూ.16,000 సోమాజిగూడ రూ.12,000 నుంచి రూ.14,000 బండ్లగూడ జాగీర్ రూ.5,500 నుంచి రూ.7,000 అత్తాపూర్ రూ.5,200 నుంచి రూ.7,000 ఉప్పల్ రూ. 5,500 నుంచి రూ. 7,500 ప్రగతినగర్ రూ. 5,800 నుంచి రూ. 8,500 మియాపూర్ రూ. 7,500 నుంచి రూ. 11,000 కూకట్ పల్లి రూ. 7,800 నుంచి రూ. 12,000 పటాన్ చెరు రూ. 5,500 నుంచి రూ. 7,500 ఎల్బీనగర్ రూ. 6,200 నుంచి రూ. 8,500 షామీర్ పేట్ రూ. 5,500 నుంచి రూ. 7,200 మేడ్చల్ రూ. 5,200 నుంచి రూ. 7,000