- 12 ఏళ్లలో 88 శాతం లాభం పొందిన బిగ్ బాస్ విజేత గౌహర్ ఖాన్
ముంబై రియల్‌ ఎస్టేట్‌ మార్కెట్‌లో మరో సెలబ్రిటీ ఆస్తి లావాదేవీ వెలుగులోకి వచ్చింది. ప్రముఖ టెలివిజన్‌ నటి, ‘బిగ్‌బాస్‌ 7’ విజేత గౌహర్ ఖాన్ ముంబైలోని వెర్సోవా ప్రాంతంలో ఉన్న తన డూప్లెక్స్‌ అపార్ట్‌మెంట్‌ను రూ.6.01 కోట్లకు విక్రయించారు. 2014 నవంబరులో ఇదే ఆస్తిని ఆమె రూ.3.20 కోట్లకు కొనుగోలు చేశారు. దాదాపు 12 ఏళ్ల తర్వాత విక్రయించిన ఈ ప్రాపర్టీకి రూ.2.81 కోట్ల లాభం వచ్చింది. అంటే కొనుగోలు ధరతో పోలిస్తే ఆస్తి విలువ సుమారు 88 శాతం పెరిగింది.
గౌహర్ ఖాన్‌కు చెందిన ఈ డూప్లెక్స్‌ ముంబైలోని అంధేరీ వెస్ట్‌ పరిధిలో, వెర్సోవా ఎస్‌.వీ.పీ. నగర్‌లో ఉన్న వెర్సోవా శివ్‌ కుటీర్‌ కో-ఆపరేటివ్‌ హౌసింగ్‌ సొసైటీలో ఉంది. భవనంలోని పై అంతస్తుల వైపు రెండు అంతస్తుల్లో విస్తరించి ఉన్న ఈ నివాసం మొత్తం సూపర్‌ బిల్ట్‌-అప్‌ విస్తీర్ణం 2,340 చదరపు అడుగులు. బిల్ట్‌-అప్‌ విస్తీర్ణం 1,872 చదరపు అడుగులుగా రిజిస్ట్రేషన్‌ పత్రాల్లో పేర్కొన్నారు. ఈ ఆస్తి విక్రయ లావాదేవీ 2026 సెప్టెంబరు 24న రిజిస్టర్‌ అయింది. కొనుగోలుదారులు స్టాంప్‌ డ్యూటీ కింద రూ.36.06 లక్షలు చెల్లించారు.
ఈ విక్రయ ధర ఆధారంగా లెక్కిస్తే, బిల్ట్‌-అప్‌ విస్తీర్ణం ప్రకారం చదరపు అడుగుకు సుమారు రూ.32,100 ధర పలికింది. సూపర్‌ బిల్ట్‌-అప్‌ విస్తీర్ణాన్ని పరిగణనలోకి తీసుకుంటే చదరపు అడుగుకు సుమారు రూ.25,700గా ఉంది. కాగా, ముంబైలోని వెర్సోవా, జుహు, లోఖండ్‌వాలా, బాంద్రా ప్రాంతాలు సినీ, టెలివిజన్‌ రంగాలకు చెందిన ప్రముఖుల నివాసాలకు ఆకర్షణీయమైన ప్రాంతాలుగా కొనసాగుతున్నాయి. వినోద పరిశ్రమకు చెందిన కార్యాలయాలు, స్టూడియోలు, ఇతర వాణిజ్య కేంద్రాలకు చేరువగా ఉండటం ఈ ప్రాంతాలకు ప్రాధాన్యం తెస్తోంది.