హైదరాబాద్‌లో రూ.50 లక్షల ఇల్లు ఎక్కడ?

హైదరాబాద్‌లో సొంతింటి కల నెరవేరాలంటే రూ.50 లక్షల బడ్జెట్‌ ఉంటే ఒకప్పుడు నగరంలోని అనేక ప్రాంతాల్లో 2బీహెచ్‌కే వచ్చేసేది. కానీ ఇప్పుడు పరిస్థితి మారుతోంది. నిర్మాణ వ్యయాలు, భూమి ధరలు, మౌలిక వసతుల అభివృద్ధి, ఐటీ–జీసీసీ ఉద్యోగాల ప్రభావంతో నివాస ధరలు పెరగడంతో రూ.50 లక్షల లోపు ఇళ్లకు లభ్యత తగ్గిపోయింది. 2026 తొలి అర్ధభాగంలో హైదరాబాద్‌లో జరిగిన మొత్తం ఇళ్ల అమ్మకాల్లో రూ.50 లక్షల లోపు ఇళ్ల వాటా కేవలం 3 శాతానికి పడిపోయింది. 2025 తొలి అర్ధభాగంలో ఇది 5 శాతంగా ఉంది. అదే సమయంలో రూ.1–2 కోట్ల ధరల విభాగం మొత్తం అమ్మకాల్లో 45 శాతం వాటాతో అతిపెద్ద సెగ్మెంట్‌గా నిలిచింది. అయితే రూ.50 లక్షలకు ఇల్లు దొరకడం పూర్తిగా అసాధ్యమేమీ కాదు. నగరంలోని ప్రధాన ఐటీ కారిడార్లకు కొంత దూరంగా వెళ్లడం, పాత నిర్మాణాల్లో రీసేల్‌ ఇళ్లను పరిశీలించడం, చిన్న విస్తీర్ణం ఉన్న అపార్ట్‌మెంట్లను ఎంచుకోవడం లేదా అభివృద్ధి చెందుతున్న శివారు ప్రాంతాల వైపు చూడటం ద్వారా ఈ బడ్జెట్‌లో అవకాశాలు కనిపిస్తున్నాయి.

పశ్చిమ హైదరాబాద్‌లో కష్టం.. ఉత్తరం, తూర్పు, దక్షిణం వైపు అవకాశాలు

హైదరాబాద్‌ రియల్‌ ఎస్టేట్‌ మార్కెట్‌లో పశ్చిమ ప్రాంతం ఇప్పటికీ ఆధిపత్యంలో ఉంది. 2026 తొలి అర్ధభాగంలో నగరంలోని కొత్త నివాస ప్రాజెక్టులలో పశ్చిమ హైదరాబాద్‌ వాటా 61 శాతంగా, అమ్మకాల్లో 63 శాతంగా ఉంది. కూకట్‌పల్లి, మాదాపూర్‌, కొండాపూర్‌, గచ్చిబౌలి, రాయదుర్గం, కోకాపేట వంటి ప్రాంతాలు ఈ కారిడార్‌లో ఉన్నాయి. అయితే ఈ ప్రాంతాల్లో రూ.50 లక్షల బడ్జెట్‌తో కొత్త 2బీహెచ్‌కేను పొందడం కష్టమవుతోంది. అందుకే నార్త్‌, ఈస్ట్‌, సౌత్‌ హైదరాబాద్‌ వైపు బడ్జెట్‌ కొనుగోలుదారుల దృష్టి మళ్లుతోంది.

1. బాచుపల్లి–ప్రగతి నగర్‌ వైపు

పశ్చిమ కారిడార్‌కు అనుసంధానంగా ఉన్నప్పటికీ గచ్చిబౌలి, ఫైనాన్షియల్‌ డిస్ట్రిక్ట్‌తో పోలిస్తే ఇక్కడ ధరలు కొంత అందుబాటులో ఉంటాయి. బాచుపల్లి, నిజాంపేట్‌ పరిసరాల్లో పాత అపార్ట్‌మెంట్లు లేదా చిన్న విస్తీర్ణం ఉన్న ఫ్లాట్లు రూ.50 లక్షల బడ్జెట్‌కు దగ్గరగా కనిపించే అవకాశం ఉంది. అయితే కొత్త గేటెడ్‌ కమ్యూనిటీలో రూ.50 లక్షలకు 2బీహెచ్‌కే దొరుకుతుందని భావించకుండా, కార్పెట్‌ ఏరియా, పార్కింగ్‌, మెయింటెనెన్స్‌ ఛార్జీలు, రిజిస్ట్రేషన్‌ ఖర్చులను కలిపి లెక్కించాలి.

2. కొంపల్లి–మేడ్చల్‌ కారిడార్‌

ఉత్తర హైదరాబాద్‌లో కొంపల్లి, గుండ్లపోచంపల్లి, మేడ్చల్‌ వంటి ప్రాంతాలు తక్కువ బడ్జెట్‌ కొనుగోలుదారులకు ప్రత్యామ్నాయంగా నిలుస్తున్నాయి. ప్రస్తుతం అందుబాటు గృహాల కోసం సూచిస్తున్న ప్రాంతాల్లో కొంపల్లి, గుండ్లపోచంపల్లి, షామీర్‌పేట, మేడ్చల్‌ వంటి ప్రాంతాలు కూడా ఉన్నాయి. ఇక్కడ ప్రధాన నగరంతో పోలిస్తే భూమి ధరలు తక్కువగా ఉండటంతో బడ్జెట్‌ ప్రాజెక్టులకు అవకాశం ఉంటుంది. అయితే కార్యాలయం పశ్చిమ హైదరాబాద్‌లో ఉన్నవారు రోజువారీ ప్రయాణ సమయం, ఇంధన వ్యయం కూడా పరిగణనలోకి తీసుకోవాలి.

3. పోచారం–ఉప్పల్‌–బోడుప్పల్‌ వైపు

తూర్పు హైదరాబాద్‌ బడ్జెట్‌ కొనుగోలుదారులకు మరో ఎంపిక. 2026 తొలి అర్ధభాగంలో తూర్పు హైదరాబాద్‌ కొత్త లాంచ్‌లలో 6 శాతం, అమ్మకాల్లో 9 శాతం వాటా సాధించింది. పోచారంలో ప్రస్తుతం రూ.50 లక్షల పరిధిలో 2బీహెచ్‌కే ప్రాజెక్టుల లిస్టింగ్స్‌ కూడా కనిపిస్తున్నాయి. ఉదాహరణకు ఒక ప్రాజెక్టులో 2బీహెచ్‌కే ధరలు రూ.47.69 లక్షల నుంచి ప్రారంభమవుతున్నట్లు ప్రస్తుత మార్కెట్‌ లిస్టింగ్‌ చూపిస్తోంది. ఇవి ప్రకటన ధరలు మాత్రమే; రిజిస్ట్రేషన్‌, పార్కింగ్‌, ఇతర ఛార్జీలతో తుది ధర మారవచ్చు.

4. అత్తాపూర్‌–రాజేంద్రనగర్‌–చింతల్‌మెట్‌

నగరానికి మరింత దగ్గరగా ఉండాలనుకునే బడ్జెట్‌ కొనుగోలుదారులు దక్షిణ హైదరాబాద్‌లోని పాత ప్రాంతాలను పరిశీలించవచ్చు. అత్తాపూర్‌, రాజేంద్రనగర్‌, చింతల్‌మెట్‌, ఆరాంఘర్‌, బండ్లగూడ, చంద్రాయణగుట్ట వంటి ప్రాంతాల్లో అపార్ట్‌మెంట్‌ నిర్మాణం పెరుగుతోంది. ఇక్కడ 1,000–1,200 చదరపు అడుగుల 2బీహెచ్‌కేలు సుమారు రూ.50–60 లక్షల పరిధిలో ఉన్నట్లు స్థానిక మార్కెట్‌ నివేదికలు పేర్కొంటున్నాయి. చింతల్‌మెట్‌ పరిధిలో ప్రస్తుతం రూ.50 లక్షల లోపు రీసేల్‌ ఫ్లాట్ల లిస్టింగ్స్‌ కూడా ఉన్నాయి.

రూ.50 లక్షల బడ్జెట్‌ అంటే నిజంగా రూ.50 లక్షలు కాదు!

కొనుగోలుదారులు చేసే అతిపెద్ద పొరపాటు ఇదే. ‘‘నా బడ్జెట్‌ రూ.50 లక్షలు’’ అంటే రూ.50 లక్షల బేస్‌ ప్రైస్‌ ఉన్న ఫ్లాట్‌ను కొనగలమని భావించకూడదు. ఇందులో ఇంకా స్టాంప్‌ డ్యూటీ, రిజిస్ట్రేషన్‌ ఛార్జీలు, జీఎస్టీ వర్తించే సందర్భాలు, పార్కింగ్‌ ఛార్జీ, మెయింటెనెన్స్‌/సొసైటీ డిపాజిట్‌, విద్యుత్‌, నీటి కనెక్షన్‌ ఛార్జీలు, క్లబ్‌హౌస్‌/అమెనిటీస్‌ ఛార్జీలు, ఇంటీరియర్‌ ఖర్చులు కూడా ఉంటాయి. అందువల్ల కాబట్టి మొత్తం కొనుగోలు బడ్జెట్‌ రూ.50 లక్షలు అయితే, ప్రాపర్టీ బేస్‌ ధరను అంతకంటే తక్కువగా ఉంచుకోవాలి.

దూరంగా వెళ్తే మరో ఖర్చు

రూ.50 లక్షలకు ఇంటి కోసం నగర శివార్లకు వెళ్లడం ద్వారా ఆస్తి ధర తగ్గవచ్చు. కానీ రోజువారీ ప్రయాణ ఖర్చు, సమయం పెరగొచ్చు. ఉదాహరణకు పశ్చిమ హైదరాబాద్‌లో పనిచేసే వ్యక్తి మేడ్చల్‌ లేదా దక్షిణ శివారులో ఇల్లు తీసుకుంటే.. ఈఎంఐ తగ్గినా ప్రయాణ ఖర్చు, సమయం పెరిగే అవకాశం ఉంది. అందుకే ఇంటి ధరతో పాటు ఇంటి నుంచి ఆఫీస్ దూరం, ప్రయాణ సమయం, రవాణా ఖర్చులతోపాటు పాఠశాల/ఆసుపత్రి/మార్కెట్‌ సౌకర్యాలు కూడా లెక్కలోకి తీసుకోవాలి.

కొత్తదా? రీసేల్‌దా?

రూ.50 లక్షల బడ్జెట్‌లో రీసేల్‌ మార్కెట్‌ కూడా కీలకంగా మారుతుంది. కొత్త ప్రాజెక్టులో రూ.50 లక్షలకు చిన్న 2బీహెచ్‌కే దొరికితే.. అదే ప్రాంతంలో కొన్ని సంవత్సరాల పాత 2బీహెచ్‌కే కొంత తక్కువకు లభించే అవకాశం ఉంటుంది. అయితే రీసేల్‌ కొనుగోలులో టైటిల్‌, బకాయిలు, బ్యాంకు లోన్‌, సొసైటీ బకాయిలు, నిర్మాణ నాణ్యత, వయసు వంటి అంశాలను పరిశీలించాలి.

రూ.50 లక్షల ఇల్లు కోసం ఎక్కడ చూడాలి?

ప్రస్తుతం మార్కెట్‌ ధోరణులను చూస్తే ‘‘సెంట్రల్‌ హైదరాబాద్‌లో రూ.50 లక్షలకు మంచి కొత్త 2బీహెచ్‌కే’’ కోసం వెతకడం కంటే, కొనుగోలుదారు తన అవసరాన్ని బట్టి మూడు మార్గాల్లో వెతకడం మంచిది:

1. నగరానికి దగ్గరగా ఉండాలి: అత్తాపూర్‌, రాజేంద్రనగర్‌, బండ్లగూడ, చింతల్‌మెట్‌ వంటి ప్రాంతాల్లో రీసేల్‌ చూడాలి.

2. కొత్త ఇల్లు కావాలి: బాచుపల్లి, కొంపల్లి, మేడ్చల్‌, పోచారం, బోడుప్పల్‌ వంటి అభివృద్ధి చెందుతున్న ప్రాంతాల్లో ప్రాజెక్టులను పరిశీలించాలి.