- ఎస్‌పీ వ‌రుణ్‌, బిల్డ‌ర్
హైదరాబాద్‌ తూర్పు దిశగా వేగంగా విస్తరిస్తున్న రియల్ ఎస్టేట్ కారిడార్ ప్రభావం ఇప్పుడు ఘట్‌కేసర్ ప్రాంతంలో స్పష్టంగా కనిపిస్తోంది. ఉప్పల్, పోచారం, ఇన్ఫోసిస్ క్యాంపస్, జినోమ్ వ్యాలీ, యాదాద్రి అభివృద్ధి, వరంగల్ హైవే విస్తరణ వంటి అంశాలతో పెట్టుబడిదారుల దృష్టి ఘట్‌కేసర్ వైపు మ‌ళ్లింది. గత కొన్నేళ్లుగా ఈ ప్రాంతంలో నివాస, వాణిజ్య అవసరాలు పెరగడంతో భూముల ధరల్లో గణనీయమైన పెరుగుదల నమోదైంది.
ప్రస్తుతం వరంగల్ జాతీయ రహదారికి సమీపంలో ఉన్న హెచ్‌ఎండీఏ అనుమతులు కలిగిన ప్లాట్లు.. లొకేషన్‌ను బట్టి చదరపు గజానికి సుమారు రూ.25 వేల నుంచి రూ.50 వేల వరకు పలుకుతున్నాయి. అంతర్గత ప్రాంతాల్లోని వెంచర్లలో గజం రూ.15 వేల నుంచి రూ.30 వేల మధ్య లావాదేవీలు జరుగుతున్నాయి. మరోవైపు వ్యవసాయ భూములు, భవిష్యత్ అభివృద్ధి అవకాశాలున్న ప్రాంతాల్లో.. ఎకరానికి రూ.1.5 కోట్ల నుంచి రూ.5 కోట్ల వరకు ధరలు నమోదవుతున్నాయి. ప్రధాన రహదారులకు సమీపంలోని భూములకు ఇంకా ఎక్కువ ధరలు పలుకుతున్నాయి.
ఘట్‌కేసర్‌లో హెచ్‌ఎండీఏ ప్లాట్లు, గేటెడ్ కమ్యూనిటీలు, విల్లా ప్రాజెక్టులు, స్వతంత్ర గృహ నిర్మాణ ప్లాట్లకు మంచి డిమాండ్ ఉంది. ఐటీ ఉద్యోగులు, మధ్యతరగతి కుటుంబాలు, దీర్ఘకాల పెట్టుబడిదారులు, ఎన్ఆర్ఐలు ప్రధాన కొనుగోలుదారులుగా ఉన్నారు. మెట్రో ప్రభావం ఉప్పల్ వరకు విస్తరించడం, ఎంఎంటీఎస్ విస్తరణ ప్రతిపాదనలు, ఔటర్ రింగ్ రోడ్‌కు అనుసంధానం, వరంగల్ హైవే అభివృద్ధి, జీనోమ్ వ్యాలీ సమీపం వంటి అంశాలు ఈ ప్రాంత ఆకర్షణను మరింత పెంచుతున్నాయి.
అయితే ఘట్‌కేసర్‌ను స్వల్పకాలిక లాభాల కంటే 5-10 సంవత్సరాల దీర్ఘకాల పెట్టుబడి దృష్టితో పరిశీలించడం ఉత్తమం. రాబోయే రోజుల్లో రీజినల్ రింగ్ రోడ్ ప్రభావం, పారిశ్రామిక మరియు ఐటీ రంగాల విస్తరణ, విద్యా సంస్థలు, ఆరోగ్య మౌలిక వసతుల అభివృద్ధి, కొత్త రెసిడెన్షియల్ టౌన్‌షిప్‌లు ఏర్పడితే ఆస్తుల విలువలు మరింత పెరిగే అవకాశాలు ఉన్నాయి. ప్రస్తుతం హైదరాబాద్‌ ఈస్ట్ గ్రోత్ కారిడార్‌లో పెట్టుబడులకు ఘట్‌కేసర్ అత్యంత ఆశాజనకమైన గమ్యస్థానాల్లో ఒకటిగా నిలుస్తోంది.